அஷ்டாங்க விமானம்

வரையரை

அஷ்டாங்க விமானங்கள் மூன்று தளங்களில் கருவறைகளும், அவற்றைச் சுற்றி வருவதற்கு வழிகளும் உடைய கட்டுமானங்கள். சாந்தார தொழில் நுட்பத்தை சிறந்த முறையில் பயன்படுத்தி உருவாக்கப் பட்டவை. இம் மரபு திராவிடக் கலையில் மட்டுமே காணக் கிடைக்கிறது. வேறு மரபுகளில் இல்லை. அஷ்டாங்க விமானம் என்னும் சொல் வைணவ பாரம்பரியத்தில் இவ்வகை கோயில்களுக்கு பயன்படுத்தப்படும் சொல்லேயன்றி திராவிட கட்டடக் கலைச் சொல் அல்ல. 

முதல் அஷ்டாங்க விமானம்

காலத்தால் முற்பட்ட முதல் அஷ்டாங்க விமானம் மாமல்லபுரம் தர்மராஜர் இரதம் எனப்படும் அத்யந்தகாம பல்லேஸ்வரம். இது ஒரு ஒற்றைக் கல் தளி. 8 ம் நூற்றாண்டின் தொடக்கத்தில் ராஜசிம்மன் பணி. இதன் மூலம் அதற்கு முன்னரே இவ்வகை கட்டுமானத்திற்கான கணக்கீடுகளும் திட்டநெறிகளும் இருந்தமை தெரிகிறது. 

தர்மராஜ ரதம், மகாபலிபுரம்

தமிழகத்தில் காணப்படும் ஒன்பது அஷ்டாங்க விமானங்களுள் இது மட்டுமே சிவனுக்குரியது. இதற்குப் பின்வந்த எட்டும் வைணவ மரபைச் சார்ந்தவை. 

அஷ்டாங்க விமானங்களின் பட்டியல்

வ எ	கோயில் பெயர்	இடம்	கருவறைகள்	காலம்	மன்னர்
1	தர்மராஜ ரதம்	மாமல்லபுரம்	1 + 1 +1	8 ம் நூ	ராஜசிம்மன்
2	வைகுந்த பெருமாள்	காஞ்சிபுரம்	1 + 1 +1 இ, கி, நி	8 ம் நூ	நந்திவர்மன் II (731-795)-
3	சுந்தரவரதர்	உத்திரமேரூர்	4 + 4 + 1	8 ம் நூ	நந்திவர்மன் II (731-795)-
4	கூடலழகர்	மதுரை	1 + 1 +1 இ, நி, கி	9-15 ம் நூ	பாண்டியர், நாயக்கர்
5	சௌமிய நாராயணப் பெருமாள்	திருக்கோட்டியூர்	1+1+1+1
6	ராஜகோபால சுவாமி	மன்னார்கோயில், திருநெல்வேலி மா	1 + 1 +1
7	ராமசாமி	சேரன்மாதேவி	1 + 1 +1 நி, இ, கி	11 நூ	சோழர்?
8	அழகிய நரசிங்கப் பெருமாள்	எண்ணாயிரம்	4 + 1 + 1		சோழர்?
9	அஷ்டலக்ஷ்மி	சென்னை	4 + 4 + 1	20 ம் நூ

நி - நின்ற கோலம்; இ - இருந்த கோலம்; கி - கிடந்த கோலம்

வைணவ மரபின் வைகானஸ ஆகமத்தில் மரீசி சம்ஹிதை அஷ்டாங்க விமான கட்டுமான நெறிகளை தெரிவிக்கிறது. 

பிரம்மாண்டமான சௌமியநாராயணர் கோயிலில் பெருமாள் மரபான மூன்று திருக்கோலங்களில் மட்டுமின்றி நான்காவதாக நடன திருக்கோலத்திலும் காட்சி தருகிறார். 

20 ஆம் நூற்றாண்டு கட்டுமானமான அஷ்டலக்ஷ்மி கோயில் சுந்தரவரதர் கோயிலின் நகல் ஆகும்.

வைகுந்த பெருமாள் கோயில்

ராமசாமி கோயில், சேரன்மாதேவி
(நன்றி: விஜய் ஷங்கர் பட்)

• ராமசாமி கோயில் சேரன்மாதேவியில் உள்ள ஒரு அஷ்டாங்க விமானம். பாண்டிய நாட்டில் சோழர்கள் 1000 ஆண்டுகள் முன் கட்டியது. கிழக்கு நோக்கியது. 
• ஆதி நாராயணன் கீழ் தலத்தில் திருமகள், நில மகளுடன் நின்ற கோலத்தில் இருக்கிறார்.
• வீற்றிருந்த பெருமாள் இரண்டாம் தலத்தில் திருமகள், நிலமகளுடன் இருந்த கோலத்தில் இருக்கிறார்.
• திருப்பாற்கடல்நாதன் மூன்றாம் தலத்தில் ஆதிசேஷன் மீது கிடந்த கோலத்தில் இருக்கிறார்.
• ராஜராஜ சோழனின் 24 ஆம் ஆட்சியாண்டு வட்டெழுத்துக் கல்வெட்டு இவ்வூரை 'சேரன்மாதேவி சதுர்வேதிமங்கலம்' என்றும் கோயிலை 'நிகரிலி சோழ விண்ணகர் ஆழ்வார் கோயில்' என்றும் அழைக்கிறது.

நன்றிக்கடன்

அம்பை மணிவண்ணன்; ஆகம சிற்ப சாஸ்திரங்களில் திருக்கோவில் அமைப்பும் திருவுருவ அமைதியும்; AR பதிப்ப்கம்; இரண்டாம் பதிப்பு 2015

சுரேந்திரன் Dr; கோயிற் கட்டிடக்கலை பயிற்சி வகுப்பு; நவம்பர்-டிசம்பர், 2021

*Dr K Dakshinamoorthy; The architectural legacy of Dhrmaraja Ratha; BUUKS; Ist Ed; 2021